Goreh

 GOREH
Sadawaning dalan kang nuju papan kang ora ana watese

Ngliwati perkara-perkara rumpil kang nora bisa diwujudake

Napaki lebu-lebu lan wedi sing rumasuk sajroning getih

Getih sing tumetes liwat mata kang wus ora bisa nyandra

Nelesi papan sing wis kothong

Kelangan sari patining ati

Mbasan saiki mung kembengan rasa

Rasa sing sekirane luwih ajur  tinimbang perih

Ora ana enteke..

Saben sak unjalan ambegan..

seseg krasa ing dhadha sisih kering

playon getih  padha oyak-oyakan

Kejaba aku ngampet napas

Banjur tak rep mripat iki

Sedhela banjur kabeh krasa lerem

Ananging arep tekan kapan

Apa  bisa  janma urip tanpa unjal ambegan..

Mokal…

Sasuwene awan nganti gumanti esuk

Mobah ora bisa jenjem

Ming klisikan mobat mabit pengangen kang ora nemokake wangsulan

kumleyang..gegawa gilingan angin kang mater ngosak asik sore

sumendhe ing papan para kang ora tak ngerteni dununge

gelem ora gelem kudu ngumbara..

iya meneh..embuh iki wus sing kaping pira

 nurut dalan jejeg kang ora ana  ancase

iya..meneh..wira-wiri netepi dalan sing ora tak karepake

Rumpil..iya terkadahang rumpil dalan kang nocoki lakuku

Saangete srengenge ketiga ngerak

Wayah bangun wus kerasa sumlenget ing embun-embun

Wayah lintir uga nggawa ayang-ayang kang sak tenane uga ora tak ngerteni

Ora suwe banjur sumlempit ing mripat kang ngalamun

Lumebu liwat pamriksa kang wiwit kothong

Dhasar raga garing sing wis wiwit gapuk

Sakgampage kanggo kobong kabrongot wanci

Mobat mabit  kaya ndadeni mawa rekta

Didamu  angin sumilir ing sakiwa tengene

mulat mulak nyacah apa wae kang ditemoni

Sasembribite angin segara wanci surup

Ora bakal bisa ngedhemake barang kang wus gebacut dadi awu

Ora bakal bisa mulihkaen apa kang wus dumadi

Isin menawa njaluk apa sing wus disuwun Sang Duwe

Banjur kowe bisa apa?

Suwala?Semaya?selak?

Sujud!!!